Nəyi dəyişdirmək lazım olduğunu bilirik

Futbol üzrə Azərbaycan milli komandasının baş məşqçisi Fernando Santos media nümayəndələri üçün mətbuat konfransı keçirib.

Ramil Şeydayev və Emin Mahmudovu artıq bağışlamısınız?

Necə yəni bağışladım? Mən o adam deyiləm ki, kimisə bağışlasın, ya bağışlamayın. Futbolçulara qarşı heç bir cəza tədbirim yoxdur. Bəyənib-bəyənmədiyimə görə oyunçuları dəvət etmirəm. Bəli, onun qərarını bəyənmədim. Kapitan kapitandır və düzgün qərarlar verməlidir. Amma bu o demək deyil ki, şəxsi simpatiya prinsipi əsasında futbolçuları dəvət etməliyəm.

Mahmudov klubunun iki oyununu buraxıb. Onu dəvət etmək nə dərəcədə düzgündür?

Komandanın tibb şöbəsindən mənə dedilər ki, səhhətində heç bir problem yoxdur. Biz tək Şaxruddin Maqomedəliyevin xidmətindən istifadə edə bilməyəcəyik. Bəhlul Mustafazadənin xəsarət alması şübhəsi var, bu barədə bu gün qərar veriləcək. Buna görə də başqa müdafiəçi dəvət edib.

Millətlər Liqasının dördüncü turundan sonra “milli”ni harada görürsünüz? Neçə xal toplaya biləcəksiniz?

Yenidən Slovakiya ilə oynamalıyıq. Zəif komanda deyil. Oktyabrdakı iki oyundan sonra neçə xal qazanacağımızı deyə bilmərəm. Əminliklə deyə bilərəm ki, futbolçularıma güvənirəm. Bilirəm ki, onlar daha çox şeyə qadirdirlər. Onlar da başa düşürlər ki, nəyisə dəyişmək lazımdır. Təbii ki, meydana qələbə üçün çıxacağıq. Mentalitetimizi dəyişib komanda kimi düşünməliyik. Fərdilikdən uzaqlaşmalıyıq. Nəyi dəyişdirmək lazım olduğunu bilirik. Futbolçuların istəyi var.

Sizin sələfiniz Gianni De Biasi də mentalitetdən danışdı, lakin onun öhdəsindən gələ bilmədi. Onu dəyişdirmək üçün neçə il lazımdır və hansı addımlar atılmalıdır?

Dəyişəcəyik. Dəyişməliyik. Bununla razılaşmayan oyunçular başqaları ilə əvəzlənəcək. İnanıram ki, onlar buna hazırdırlar. İkinci dəfə bir araya gələcəyik, çətin olacaq, amma bacaracağıq. Mən bura dəyişikliklər etmək üçün gəlmişəm. Mən hansı addımları atacağımı bilirəm. Bu, hər kəsə aid deyil, amma bir çox milli oyunçular yalnız özləri haqqında düşünürlər. Amma komanda haqqında düşünmək lazımdır.

AFFA-nın yeni futbol inkişaf strategiyası ilə bağlı hansı təkliflərlə çıxış etmisiniz?

AFFA ilə danışdığımız layihə var. Qalanları öz aramızda qalsın. AFFA istəyirsə, qoy bu haqda danışsın. Buraya gəldiyim ilk gündən deyirəm ki, belə bir layihə həyata keçirmək lazımdır ki, millimiz qalib gəlsin, məğlubiyyət az olsun.

Emin Mahmudov Azərbaycan millisinə niyə dəvət olunur?

Çünki o, keyfiyyətli futbolçudur. O, digər futbolçulara xas olmayan keyfiyyətlərə malikdir. Başqalarının verə bilmədiyi qərarlar verə bilir. Heç kəs düşünə bilməz ki, milliyə dəvət alsam, oynayacam. Kimin oynayacağına, kimin oynamayacağına mən qərar verirəm. Futbolçular başa düşməlidirlər ki, Azərbaycan komandasına xidmət edirlər. Biz belə bir komandaya sahib olmaq istəyirik. Milli komandaya futbolçular seçirik. Mən və köməkçilərim Azərbaycan çempionatının bütün oyunlarını izləyirik. Televiziyada legionerlərimizə baxırıq. Əmin olun, sifarişlə heç kim dəvət almır. Biz agentlərdən sifariş almırıq. Telefonum bağlıdır. Mən həmişə bu üslubda işləyirəm və bundan sonra da çalışacağam. Bu mənim məsuliyyətimdir. Əmin olun, heç kim mənim qərarlarıma təsir etmir. Bu mümkün deyil.

Qeyd edək ki, millimiz oktyabrın 11-də Tallində Estoniya yığması, oktyabrın 14 isə Bakıda Slovakiya millisiylə qarşılaşacaq.