Terrorçular Pakistanda sərnişin qatarını ələ keçiriblər

16:30

Bəluc Azadlıq Ordusu (BLA) terrorçuları hərbi əməliyyata cəhd edilərsə, yüzlərlə sərnişini öldürməklə hədələyirlər.

***

Terrorçular Pakistanın Kvetta şəhərindən Pişəvərə gedən "Jaffar" ekspress qatarını qaçıraraq 500-ə qədər sərnişini girov götürüblər.

Bu barədə "Reuters" xəbər yayıb.

Çərşənbə axşamı Pakistanın cənub-qərbində separatçı yaraqlılar yüzlərlə sərnişini daşıyan sərnişin qatarını atəşə tutublar, nəticədə bir qatar maşinisti yaralanıb.

Dəmiryol rəsmiləri bildiriblər ki, göyərtəsində 9 vaqonda təxminən 400 sərnişinin olduğu "Jaffar" ekspressi Pakistanın cənub-qərbindəki Bəlucistan əyalətindəki Kvettadan Hayber-Paxtunxvanın Pişəvər şəhərinə gedərkən atəşə tutulub.

Açıqlamada silahlı separatçı qrup olan Bəluc Azadlıq Ordusu (BLA - Hindistan tərəfindən dəstəkləndiyi güman edilir - ANS Press) hücuma görə məsuliyyəti öz üzərinə götürərək, təhlükəsizlik qüvvələri də daxil olmaqla, qatardan girov götürdüklərini bildirib.

Əyalət hökuməti və ya dəmir yolu rəsmiləri girov götürüldüyünü təsdiqləməyib.

Dəmiryol rəsmisi bildirib ki, təhlükəsizlik qüvvələri hadisə yerinə, Bəlucistanın Bolan rayonunun Müşqaf bölgəsinə çatıb.

Bəlucistan hökuməti fövqəladə tədbirlər tətbiq edib və bütün qurumlar vəziyyətlə məşğul olmaq üçün səfərbər edilib, hökumət sözçüsü Şahid Rind bildirib.

Separatçı yaraqlı qrupların Bəlucistanda onilliklər boyu davam edən üsyanı hökumətə, orduya və bölgədəki Çinin maraqlarına qarşı tez-tez hücumlara səbəb olub, minerallarla zəngin ehtiyatlardan pay almaq tələbini irəli sürüb.

BLA Bəlucistan üçün müstəqillik istəyir. Bu, onilliklər ərzində Cənubi Asiya dövlətinin hökuməti ilə mübarizə aparan bir neçə etnik üsyançı qrupdan ən böyüyüdür və onun Bəlucistanın zəngin qaz və mineral ehtiyatlarını ədalətsiz şəkildə istismar etdiyini bildirir.