Türkiyə İsraillə əlaqələri kəsir, hava məkanını bağlayır

Türkiyənin xarici işlər naziri Hakan Fidan İsraillə ticari-iqtisadi əlaqələrin tamamilə kəsildiyini və Türkiyə hava məkanının İsrail təyyarələri üçün bağlandığını açıqlayıb, "The Jerusalem Post" yazır.

Nəşrin yazdığına görə, bu addımın nəticələri hələ qiymətləndirilməsə də, Türkiyə ərazisindən uçuşların məhdudlaşdırılması İsraildən Gürcüstan və Azərbaycana marşrutların müddətini təxminən iki saat artıra bilər.

İsrail rəsmilərindən biri nəşrə verdiyi şərhdə qeyd edib ki, Ankara daha əvvəl də oxşar bəyanatlar verib, lakin ölkələr arasında iqtisadi əlaqələr davam edir.

“The Jerusalem Post” həmçinin xatırladır ki, Türkiyənin bu qərarı ölkənin liman idarələrinin yeni qeyri-rəsmi tələbləri ilə bağlı xəbərlər fonunda qəbul edilib. Bu məlumatlara görə, gəmiçilik şirkətlərindən gəmilərinin İsraillə əlaqəsi olmadığına və bu ölkəyə gedən hərbi və ya təhlükəli yük daşımadığına dair yazılı zəmanət vermələri istənilir.

Cümə günü Türkiyə parlamentinin növbədənkənar iclasında çıxış edən Fidan bildirib ki, Ankara İsrailin BMT Baş Assambleyasında iştirakının tam dayandırılmasına nail olmaq üçün həmfikir ölkələr qrupu ilə işləməyə davam edəcək.

“Biz İsraillə ticarəti dayandırmaq, İsrailin BMT Assambleyasında iştirakını tamamilə dayandırmaq, İsrailə silah və sursat tədarükünü dayandırmaq üçün həmfikir ölkələrlə birgə addımlar atmağa davam edəcəyik”, – Türkiyə mediası onun sözlərini sitat gətirib.

Fidan əlavə edib ki, Ankaranın diplomatik səyləri iki əsas sahəyə cəmlənib: Qəzzada hərbi əməliyyatlara və soyqırıma dərhal son qoyulması, həmçinin anklavlara humanitar yardımın təmin edilməsi.

O, ikinci prioritetin Fələstin dövlətinin yaradılması ideyasını beynəlxalq gündəmdə saxlamaq və bu təşəbbüsə geniş dəstəyin təmin edilməsi olduğunu qeyd edib. Nazirin sözlərinə görə, İsrailin beynəlxalq hüquqa məhəl qoymaması və Fələstinə qarşı sərt siyasətini davam etdirməsi istər regionda, istərsə də ondan kənarda ciddi nəticələrə gətirib çıxaracaq.