ABŞ-ın İrana son hücumları nəticəsində ölənlərin sayı

11:18

İran Səhiyyə Nazirliyi cümə axşamı bildirib ki, ABŞ-nin son iki gündə İranın beş əyalətinə endirdiyi zərbələr nəticəsində 14 nəfər ölüb, 78 yaralı var.

Nazirliyin İctimaiyyətlə Əlaqələr və İnformasiya Mərkəzinin rəhbəri Hüseyn Kirmanpur “X” sosial media şəbəkəsində yazıb: “ABŞ son iki gündə İranın beş əyalətini hədəfə alıb. Zərbələr indiyə qədər 14 ölüm və 78 yaralanma ilə nəticələnib”.

Nazirliyin məlumatına görə, yaralılardan 47-si xəstəxanadadır, qalanları isə tibbi yardım aldıqdan sonra evə buraxılıb.

İranın dövlət xəbər agentliyi IRNA-nın Xuzistan əyalətinin təhlükəsizlik məsələləri üzrə qubernator müavini Vəliullah Hayatiyə istinadla verdiyi məlumata görə, qurbanlardan üçü cənub-qərbdəki Əhvaz şəhəri yaxınlığında həlak olub.

Vaşinqtonun Tehranı Hörmüz boğazından keçən üç ticarət gəmisinə hücum etməkdə günahlandırmasından sonra gərginlik artıb və bu, ABŞ-ni İranın cənub sahili boyunca hərbi hədəflərə ardıcıl hücumlar etməyə vadar edib.

***

04:54

"ABC News"un məlumatına görə, ABŞ Hərbi Hava Qüvvələri sonuncu kütləvi hücumda İrana artıq 200 zərbə endirib.

"Axios" xəbər verir ki, ABŞ İrana hücumlarının əhatə dairəsini genişləndirərək radarları və hava hücumundan müdafiə sistemlərini hədəf alıb.

➖Fars körfəzindəki Cask şəhəri və Əbu Musa adasında partlayışlar baş verib. İran mediası həmçinin Buşehr nüvə elektrik stansiyası yaxınlığında zərbələrin baş verdiyini bildirib.

➖İranın Çabahar və Kenark şəhərlərində təxminən 10 partlayış səsi eşidilib və Çabaharın bəzi yerlərində elektrik kəsintiləri baş verib.

➖ABŞ-ın İranın cənub-şərqindəki Nadasa elektrik stansiyasına kütləvi hava hücumları edilib.

➖Sosial mediada çoxsaylı yanğınlar və elektrik kəsintiləri barədə məlumatlar yayılıb.

Tramp İrana yeni zərbələri Hörmüz boğazında gəmilərə edilən hücumlara görə qisas adlandırıb.

İran bölgədəki Amerika bazalarına qarşı genişmiqyaslı cavab zərbəsi endirir. Buna cavab olaraq, Küveyt, Qatar, Bəhreyn və BƏƏ-də artıq fövqəladə vəziyyət elan edilib.