İran generalı İsrail və ABŞ-ı Moskvadan hədələdi

İranlı general Moskvada açıqlamalar verib:

"Tehranın İsrail tərəfinin hərəkətlərinə cavabı “ləyaqətli və sərt” olacaq". Bunu TASS-a İran Silahlı Qüvvələrinin Baş Qərargahının əməliyyatlar üzrə rəis müavini, briqada generalı Əli Şadmani Moskvada “Ordu-2024” forumunun kuluarlarında deyib.

“İranın nöqteyi-nəzərindən, terror qruplaşması [HƏMAS lideri İsmayıl Haniyənin qətli ilə] regionda təhlükəsizlik balansını pozub. İran kimi güclü ölkənin cavab verməli olub-olmayacağına dünya əksəriyyəti qərar vermir. İntiqam üsulunu ruhani liderimiz müəyyən edib. Bu asan seçim deyildi”, - deyə Şadmani bildirib.

İranlı generalın sözlərinə görə, “bu vəziyyətə təsir edən iki amil var - regiondakı vəziyyət, ikincisi isə daxili məsələlərə yönəlib. Bütün dövlət xadimləri yekdilliklə bu qənaətə gəliblər ki, cavab ləyaqətli və sərt olmalıdır”.

Şadmani həmçinin bildirib ki, Vaşinqtonun Yaxın Şərqdəki hərəkətləri ABŞ-ın özünün təhlükəsizliyinə təsir edə bilər. “Bizim Birləşmiş Ştatlara mesajımız ondan ibarətdir ki, onlar [Yaxın Şərqdəki] bu terror qruplaşmasına dəstəyi dayandırsınlar, çünki bu, təkcə bizim deyil, həm də onların regionunun təhlükəsizliyinə xələl gətirə bilər”, - deyə general bildirib.