ABŞ və İran arasında birbaşa danışıqlar olacaq?

ABŞ və İran nümayəndə heyətləri arasında birbaşa danışıqların aprelin 27-də İslamabadda keçirilməsi gözlənilir.

Bu barədə “Axios” portalı mənbələrə istinadən məlumat yayıb.

Qeyd olunur ki, ABŞ nümayəndələri Stiv Uitkoff və Cared Kuşner əvvəlcə Pakistan vasitəçiləri ilə ayrı-ayrı görüşlər keçirəcək, bundan sonra İran tərəfi ilə üçtərəfli formatda görüşün təşkili müzakirə olunacaq.

Məlumata görə, İranın xarici işlər naziri Abbas Əraqçi həftə sonu Pakistan tərəfi ilə məsləhətləşmələr aparacaq. Bundan sonra ABŞ-la birbaşa təmasların vaxtı və formatı dəqiqləşdirilə bilər.

İran tərəfi isə bildirib ki, ABŞ-la heç bir görüşün keçirilməsi planlaşdırılmır. "Rəsmi səfər üçün Pakistanın İslamabada gəlirik. Xarici işlər naziri Əraqçi, Amerikanın tətbiq etdiyi təcavüz müharibəsinə son qoymaq və bölgəmizdə sülhün bərpası üçün davam edən vasitəçilik və xoşməramlı fəaliyyətləri ilə Pakistanın yüksək səviyyəli rəsmiləri ilə görüşəcək", - deyə İran XİN sözçüsü İsmayıl Bəqayi şənbə günü səhər saatlarında "X" yazısında yazıb.

"İran və ABŞ arasında heç bir görüşün keçirilməsi planlaşdırılmır. İranın müşahidələri Pakistana çatdırılacaq", - deyə o vurğulayıb.

İranın xarici işlər naziri Seyid Abbas Əraqçi cümə günü İslamabad, Məsqət və Moskvaya regional səfərə başlayıb.

Səfərin əsas məqsədləri ikitərəfli məsləhətləşmələrin aparılması, regiondakı mövcud inkişafların, eləcə də ABŞ, İsrail və İran müharibəsinin son vəziyyətinin müzakirə edilməsidir.