Avropa Macarıstanda Orbanın uduzmasını sevinclə qarşıladı

Brüssel sevinir: Macarıstan Orbanın məğlubiyyətindən sonra Avropanın mərkəzinə qayıdır.

"Viktor Orbanın seçkilərdəki məğlubiyyəti Brüsseldə rahatlıq və hətta bir az da olsa sevinc hissi yaratdı. Avropa rəsmiləri ümid edirlər ki, yeni Macarıstan hökuməti danışıqlar masasında daha Avropapərəst mövqe tutacaq", - deyə CNN bildirir.

Avropa Komissiyasının Prezidenti Ursula fon der Leyen qeyd edib: "Macarıstan Avropanı seçib. Avropa həmişə Macarıstanı seçib. Birlikdə biz daha güclüyük. Ölkə Avropa yolunu geri qaytarır. Avropa İttifaqı daha da güclənir".

Avropa Parlamentinin sədri Roberta Metsola əlavə edib ki, Macarıstan "Avropanın mərkəzində öz yerini tutur".

Fransa Prezidenti Emanuel Makron qələbənin "macar xalqının Avropa İttifaqı dəyərlərinə və Macarıstanın Avropadakı roluna sadiqliyini nümayiş etdirdiyini" vurğulayıb.

Almaniya kansleri Fridrix Merz isə "güclü, təhlükəsiz və vahid Avropa" üçün birgə səylərə çağırıb.

Britaniyanın Baş naziri Kir Starmer seçkiləri "təkcə Macarıstan üçün deyil, həm də Avropa demokratiyası üçün tarixi bir an" adlandırıb.

Polşa Baş naziri Donald Tusk bunu qısa şəkildə yekunlaşdırıb: "Macarıstan. Polşa. Avropa. Yenə birlikdə!".

Seçkilərdə qalib gələn Piter Magyar baş nazir kimi ilk xarici səfərinin Polşaya olacağını elan edib.