Bakı Ekspo Mərkəzində ADEX Müdafiə Sərgisi keçiriləcək FOTO

2024-cü ildə regionun müdafiə sənayesinə həsr olunmuş ən böyük tədbir olan ADEX Azərbaycan Beynəlxalq Müdafiə Sərgisi beşinci ildönümünü qeyd edəcək.

Builki sərgi sentyabrın 24-dən 26-dək Bakı Ekspo Mərkəzində keçiriləcək. Eyni zamanda, həmin ərazidə 14-cü Beynəlxalq “Daxili təhlükəsizlik, təhlükəsizlik və xilasetmə avadanlığı” Securex Caspian sərgisi keçiriləcək.

İlk ADEX sərgisi 2014-cü ildə təşkil olunub. Bu tədbir iki ildən bir keçirilir və beşinci ildönümünü qeyd etməsinə baxmayaraq, sərgi artıq 10 ildir ki, uğurla fəaliyyət göstərir, iştirakçıların siyahısını və əhatə etdiyi sektorları daim genişləndirir. 10 il ərzində uğurlu fəaliyyət göstərən tədbir 50-dən çox ölkədən çoxsaylı şirkətləri və 200-ə yaxın rəsmi nümayəndə heyətini bir araya gətirib. Bu müddət ərzində sərgini 30.000-dən çox qonaq ziyarət edib.

ADEX həm Azərbaycanda, həm də regionda müdafiə sənayesi və təhlükəsizlik sahəsində əlamətdar hadisədir. Bu irimiqyaslı tədbir regionda keçirilən ən böyük hərbi texnika sərgilərindən biridir və Azərbaycanın müdafiə sənayesi kompleksinin gücünü və potensialını nümayiş etdirir. ADEX qabaqcıl texnologiyaların təqdimatı, beynəlxalq əməkdaşlığın gücləndirilməsi və ölkənin müdafiə sənayesinin inkişafı üçün səmərəli platforma rolunu oynayır.

ADEX sərgisi Azərbaycan Respublikası Müdafiə Sənayesi Nazirliyinin təşəbbüsü və təşkilatçılığı, eləcə də Azərbaycan Müdafiə Nazirliyinin dəstəyi ilə keçirilir. Tədbiri Caspian Event Organisers beynəlxalq tərəfdaşı Caspian Event Management ilə birgə təşkil edir.

ADEX Qızıl Sponsorları arasında Baykar və İsrail Aerospace Industries, Bürünc Sponsoru isə Barzan Holdingsdir.

Sərginin beşinci ildönümü ilə bağlı tədbirlər çərçivəsində “ADEX News” qəzetinin xüsusi buraxılışı işıq üzü görəcəkdir. Bu buraxılışda iştirakçı şirkətlərin təqdim etdiyi yeni məhsullar və innovasiyalar haqqında xəbərlər, eləcə də sərginin yüksək səviyyəli qonaqları, müxtəlif nümayəndə heyətlərinin üzvləri və sənaye ekspertləri ilə müsahibələr təqdim olunacaq.

Sərgilər haqqında ətraflı məlumatı sosial şəbəkələrdə və rəsmi saytlarda (www.adex.az və www.securexcaspian.az) əldə etmək olar.