Əraqçi etirazçıların asılacağı xəbərlərini təkzib edib

İran sanksiyaların qaldırılması müqabilində nüvə proqramının dinc xarakter daşımasına zəmanət verməyə hazırdır.

Sanksiyaların qaldırılması müqabilində Tehran güzəşt olaraq nüvə proqramının həmişə dinc xarakter daşıyacağına zəmanət verməyə hazırdır. İranın xarici işlər naziri Əraqçi bunu Fox News-a verdiyi müsahibədə bildirib.

O, həmçinin qeyd edib ki, İran raket proqramından imtina etməyi müzakirə etməyə hazır deyil, çünki bu, ölkənin milli təhlükəsizliyi və müdafiəsinin əsas elementidir. "Ballistik raketlər bizim müdafiə vasitəmiz və ən etibarlı müdafiə vasitəmizdir; bu, müzakirə mövzusu deyil. Təhlükəsizliyimiz və müdafiəmiz üçün lazım olduğu halda, niyə ballistik raketlərimiz barədə danışıqlar aparmalıyıq", - deyə o əlavə edib.

Əraqçi həmçinin etirazçıların asılacağı ilə bağlı xəbərləri də təkzib edib: "Asılmadan söhbət gedə bilməz... Bu, prezidenti (Trampı) buna cəlb etmək üçün başladılan və fəlakətli nəticələrə səbəb ola biləcək dezinformasiya kampaniyasının elementlərindən biridir." Onun sözlərinə görə, etirazlar minlərlə deyil, bir neçə yüz insanın ölümünə səbəb olub. Xarici işlər naziri qeyd edib ki, hazırda İranda heç bir nümayiş və ya etiraz yoxdur və ölkə sakit vəziyyətə qayıdıb.

Əraqçi həmçinin Trampa müraciət edərək deyib: "İyun ayında etdiyiniz eyni səhvi təkrarlamayın. Əgər eyni təcrübəni yenidən yaşamağa çalışsanız, nəticə eyni olacaq. Müharibə ilə diplomatiya arasında diplomatiya ən yaxşı yoldur."