Əsəd Rusiya rəsmisi ilə söhbətdən sonra niyə Suriyadan qaçdı

"Əsəd Rusiya rəsmisi ilə görüşdükdən sonra Dəməşqi tərk edib."

Bəşər Əsədin oğlu Hafiz keçmiş prezidentin Suriyadan qaçması ilə bağlı baş verənlərdən danışıb.

Hafiz izah etdi ki, noyabrın sonunda Moskvada dissertasiya müdafiə edib.

Anası Əsma (sümük iliyi transplantasiyasından sonra Moskva xəstəxanasında idi) və bacısı Zein də burada idi.

Dekabrın 1-də vəziyyət pisləşəndən sonra Hafiz Əsəd atası və qardaşı Kərimə dəstək olmaq üçün Dəməşqə uçub. Dekabrın 7-si, Hafiz Əsədin fikrincə, adi bir gün idi.

Bəşər Əsədin oğlu deyir: “Gecə yarısından sonra, Rusiya rəsmisi Əl-Malki bölgəsindəki evimizə gələndə hər şey dəyişdi."
Hafiz Əsədin sözlərinə görə, bu naməlum məmur dekabrın 7-dən 8-nə keçən gecə Bəşər Əsədin prezident iqamətgahına gələrək hökumət qoşunlarının silahlı müxalifətə qarşı döyüşlərinə nəzarət etmək üçün bir neçə gün ərzində Latakiyaya köçmək barədə təcili xahişini çatdırıb.

Dəməşq Beynəlxalq Hava Limanında Bəşər Əsəd və iki oğluna keçmiş prezidentin qardaşı Maher Əsəd də qatılıb. Onlar gecə saat üçdə Rusiya hərbi təyyarəsi ilə Xmeymim hava limanındakı Rusiya bazasına uçublar.

Enişdən sonra Əsədlər hava limanından 40 kilometr aralıda yerləşən Burj İslam bölgəsindəki prezident iqamətgahına getməli idilər. Lakin zənglərə heç kim cavab vermədiyi üçün yaşayış yeri ilə əlaqə saxlamaq cəhdləri uğursuz alınıb. Eyni zamanda, Bəşər Əsədə hərbçilərin cəbhə xəttindən geri çəkilməsi və qalan son mövqelərin itirilməsi barədə xəbərlər gəlməyə başlayıb.

“Gün ərzində Rusiya bazasının komandanlığı ətrafdakı vəziyyətin ciddiliyi barədə bizə məlumat verdi. Onlar bizə bildirdilər ki, terrorçular bütün ölkəyə yayıldığı, vəziyyət xaosa düşdüyü, hərbi rəhbərliklə bütün əlaqə kəsildiyi üçün bazanı tərk etmək artıq mümkün deyil. Baza komandanlığı Moskva ilə məsləhətləşmələrdən sonra bizə bildirdi ki, bizim Rusiyaya uçmağımız tələb olunub. Bir müddət sonra Moskvaya uçan Rusiya hərbi təyyarəsinə mindik və həmin gün axşam orada eniş etdik”, - deyə Hafiz Əsəd bildirib.