İranda növbədənkənar prezident seçkiləri keçirilir YENİLƏNİR
Bugünkü seçkidə 4 nəfər mübarizə aparır
![İranda növbədənkənar prezident seçkiləri keçirilir YENİLƏNİR](/uploads/images/2024/06/rs/image_750x_667e4a36966af-750-1080-resize.webp)
13:41
İslam İnqilabının Rəhbəri Ayətullah Xamenei bu gün səhər Tehranda 14-cü prezident seçkilərində səs verib.
***
11:42
İranda növbədənkənar prezident seçkilərində səsvermə başlayıb.
Seçki məntəqələri yerli vaxtla saat 08:00-da açılıb. Dövlət başçısı postu uğrunda dörd namizəd mübarizə aparır.
İranın "Mellat", ISPA və "Shenaaxt" beyin mərkəzlərinin bütün seçki kampaniyası boyu keçirdiyi rəy sorğularının son nəticələrinə görə, hazırda Pezeşkian liderdir. Cəlili və Qalibaf isə cüzi fərqlə müvafiq olaraq ikinci və üçüncü yerləri tuturlar.
Qeyd edək ki, İranda 90 min səsvermə məntəqəsi fəaliyyət göstərir. Azı 344 məntəqə ölkədən kənardakı vətəndaşlar üçün açıq olacaq.
09:29
Bu gün İran İslam Respublikasında növbədənkənar prezident seçkiləri keçirilir.
İranın seçki qərargahının məlumatına görə, növbədənkənar prezident seçkilərində 61 milyon 452 min 321 nəfər səs vermək hüququna malikdir.
Seçkilər üçün 60 minə yaxın seçki məntəqəsi yaradılıb.
Seçki məntəqələrinin səhər saat 8-də açıldığını bildirilir.
Xatırladaq ki, ötən gün namizədlərdən ikisi - Əlirza Zakani (Tehran meri) və Seyid Əmir Hüseyin Qazizadə Haşimi (parlament sədrinin keçmiş müavini) seçkilərdən geri çəkildiklərini bəyan ediblər.
Onlar seçiciləri mühafizəkarların namizədinə (Səid Cəlili və Məhəmməd Baqir Qalibaf) səs verməyə çağırıblar.
Bugünkü seçkidə 4 nəfər mübarizə aparır:
Səid Cəlili - İran ali rəhbərinin Təhlükəsizlik Şurasındakı nümayəndəsi;
Mustafa Purməhəmmədi - prokuror və keçmiş ədliyyə naziri;
Məsud Pezeşkian - parlamentin deputatı, keçmiş səhiyyə naziri;
Məhəmməd Baqir Qalibaf - parlamentin hazırkı sədri.
Namizədlərdən heç biri lazımi miqdarda səs yığa bilməsə, iyulun 5-də ən çox səs toplayan iki namizədin iştirakı ilə seçkilərin ikinci turu keçiriləcək.
İran qanunvericiliyinə əsasən, prezident birbaşa ümumi səsvermə yolu ilə dörd il müddətinə seçilir. Eyni şəxs ardıcıl iki müddətdən çox dövlət başçısı seçilə bilməz. Prezident postuna namizəd olmaq istəyən şəxs 40-75 yaşlarında, dövlət qurumlarında rəhbər vəzifələrdə iş təcrübəsinə malik İran vətəndaşı olmalıdır.
Mayın 19-da İranın şimalındakı Şərqi Azərbaycan əyalətində göyərtəsində ölkə prezidenti İbrahim Rəisinin və xarici işlər naziri Hüseyn Əmir Abdullahianın olduğu helikopter qəzaya uğrayıb. Helikopterdə olan 9 nəfərin hamısı həlak olub. Bu səbəbdən də növbədənkənar prezident seçkiləri gündəmə gəlib.