London Bakıyla münasibətləri strateji tərəfdaşlığa qaldırır

Britaniya Azərbaycanla ikitərəfli münasibətlərin strateji tərəfdaşlığa yüksəldiyini bəyan edib.

Böyük Britaniyanın xarici işlər naziri Doughty avqustun 25-də Bakıya rəsmi səfəri zamanı Britaniya ilə Azərbaycan arasında münasibətlərin strateji tərəfdaşlığa yüksəldiyini açıqlayıb. Müvafiq bəyanatı Böyük Britaniyanın Bakıdakı səfirliyi yayıb. Qeyd olunur ki, Britaniya və Azərbaycan arasında keçirilən 6-cı Strateji Dialoq çərçivəsində tərəflər Ermənistan-Azərbaycan münasibətlərinin normallaşdırılması, Rusiya-Ukrayna müharibəsi, həmçinin regional təhlükəsizlik məsələləri də daxil olmaqla, geniş spektrli məsələləri müzakirə ediblər.

Səfər Londonun həm Azərbaycanda, həm də bütün Cənubi Qafqazda iqtisadi artım, təhlükəsizlik, təhsil və iqlim dəyişikliyi ilə mübarizə sahələrində əməkdaşlığın gücləndirilməsinə sadiqliyini vurğuladı. Böyük Britaniya da Azərbaycanı çətin geosiyasi vəziyyətdən çıxmaqda və regionda sabitliyin qorunmasında əvəzsiz tərəfdaş kimi müəyyən edib.

Səfər çərçivəsində Böyük Britaniyanın Azərbaycanda fəaliyyət göstərən biznes nümayəndələrinin iştirakı ilə işgüzar nahar keçirilib. İştirakçılar investisiya və strateji tərəfdaşlıq üçün genişləndirilmiş imkanları müzakirə ediblər. Əsas mövzular arasında Azərbaycanın regional enerji lideri kimi rolu və Avropa ilə Asiya arasında mühüm ticarət marşrutu olan Orta Dəhlizin inkişafında müstəsna potensialı yer alıb. Bu cür əməkdaşlığın Böyük Britaniyanın təmiz enerji sahəsində qlobal lider olmaq məqsədinə birbaşa töhfə verdiyi, Azərbaycanın iqtisadiyyatın şaxələndirilməsi və davamlı inkişafı istiqamətində səylərini dəstəklədiyi vurğulanıb.

“Bu səfərin uğurla başa çatması Böyük Britaniya və Azərbaycan arasında qarşılıqlı hörmətə, ortaq maraqlara və hər iki ölkənin regional rifah və təhlükəsizliyə verdiyi töhfənin tanınmasına əsaslanan münasibətlərdə yeni mərhələnin başlanğıcını qoydu”, - deyə məlumatda bildirilir.