Oruc tutarkən toxluq müddətini uzadan qidalar yeyilməlidir

İmsakda düzgün qidalanmaqla gün ərzində həm su, həm də enerji balansını qorumaq olar. Mütəxəssislər imsakda toxluq müddətini uzadan, bədəndə maye saxlayan qidalara üstünlük verməyi tövsiyə edirlər. Həzm problemləri yaşamamaq, qanda şəkərin miqdarını normada saxlamaq üçün üzvü qidalardan daha çox istifadə edilməlidir. Tərkibində mürəkkəb karbohidratlar, zülallar, vitamin və minerallar orqanizm üçün xeyirli yağlar olan məhsullar toxluq hissini daha uzunmüddətli edir.

Həkim-terapevt Arzu Musayeva deyib: “Orqanizmi birdən-birə qida ilə yükləmək düzgün deyil, çünki oruc tutanlar arasında müəyyən xəstəlikləri olanlar da var. Xroniki xəstəliyi olanlar qidalanma ilə əlaqədar dərman qəbulunda dəyişiklik etməli olurlar. Təzyiqi və şəkərli diabeti olan xəstələr səhər-axşam imsak və iftar vaxtları dərmanları qəbul edərək oruc tutmağı davam edə bilərlər. İftardan fərqli olaraq imsak vaxtı daha tutarlı qidalara üstünlük vermək lazımdır”.

Mütəxəssislər hesab edirlər ki, fasilələrlə qidalanmaq daha çox faydalıdır. Əsas yeməklərdən bir neçə çeşid varsa, onlardan birinə üstünlük verilməli, mümkün qədər az yağlı yeməklər qəbul edilməlidir. Xəmir xörəklərinin və qızartmaların, tərkibində sous olan kalorili yeməklərin Ramazan ayı boyun iftar süfrələrində yer almaması tövsiyə olunur.

Həkim-diyetoloq Turanə Cəfərova isə iftar süfrəsinin bəzi qaydalarını xatırladıb: “İftar açılarkan soyuq su ilə deyil, otaq temperaturunda olan ilıq su, zeytun və yaxud xurma ilə açılmalıdır. Əvvəlcədən ağır yeməkdən başlamaq lazım deyil. Qidalanmağa tərəvəz salatı və yaxud da yüngül tərəvəz şorbasından başlamaq daha düzgündür. Şirniyyat yemək hissi varsa, onu yeməkdən 1 saat sonra qəbul etmək olar. Lakin o da ağır şirniyyatlar yox, süddən hazırlanmış yüngül şirniyyat olmalıdır”.

İftarla imsak arası bol miqdarda su içmək tövsiyə edilir. Tünd qara çay və qəhvə kimi kofeinli içkilər içmək məsləhət görülmür. Maye olaraq bitki çayı, az şəkərli kompot, ayran və süd kimi məhsullar da bağırsaqların fəaliyyətinə müsbət təsir edir. İftardan saat yarım və yaxud iki saat sonra gəzmək həzmə kömək edir, zəifləyən metabolizmi sürətləndirir və çəkinin artmasının qarşısını alır. Yatmazdan əvvəl qatıq yemək bədəndə suyun saxlanmasını tənzimləyir. Oruc tutanlar yuxu rejiminə də düzgün əməl etməlidirlər.