"Rəsulzadə - 140" mükafatları təqdim edildi

Məhəmməd Əmin Rəsulzadənin 140 illik yubileyinə həsr olunan və bu il 29 yanvar-1 fevral tarixlərdə keçirilmiş “II Beynəlxalq Rəsulzadə qiraətləri” mövzusunda beynəlxalq elmi konfransı və onun materiallarından ibarət eyni adlı kitabın həmin günlər təqdimat mərasimlərini yəqin ki, xatırlayırsınız. “II Beynəlxalq Rəsulzadə qiraətləri. M.Ə.Rəsulzadə irsi Müstəqillik, Demokratiya və Dövlətçilik dəyərləri sistemində” adlanan 864 səhifəlik bu məqalələr və sənədlər toplusu 17 ölkədən 61 alim və müəlliflərin əsərlərini əhatə edir. Kitabın “Məhəmməd Əmin Rəsulzadə və Azərbaycan gəncliyi” bölümündə isə 8 xarici ölkədən Azərbaycan diasporunun yeni nəsil nümayəndələri – 13 gəncin “Rəsulzadə mənim üçün kimdir” mövzusunda esseləri toplanmışdır.

Beynəlxalq konfransın təşkilatçılarından "ANS" Şirkətlər Qrupunun prezidenti Vahid Mustafayev M.Ə.Rəsulzadə irsinin araşdırılmasında və təbliğində xüsusi xidmətləri olan şəxsləri mükafatlandırmaq təşəbbüsü irəli sürərək sahibi olduğu VMF Saat Fabriki tərəfindən üzərində Məhəmməd Əmin bəyin şəklini və “M.Ə.Rəsulzadə - 140” imzasını əks etdirən eksklüziv yubiley saatları hazırlatmışdı. Bu mükafatlar əsasən xarici müəlliflərə və konfransın xarici təşkilatçıları olan universitetlərin rəhbərliyinə, eləcə də Rəsulzadə haqqında son illər orijinal monoqrafiyalar yazmış iki nəfər azərbaycanlı alimə təqdim olundu.

Lakin V.Mustafayev görkəmli alimlərlə yanaşı, ayrıseçkilik qoymadan “Rəsulzadə mənim üçün kimdir” esselərinin müəllifləri olan həmin 13 gənci də mükafatlandırmaq məqsədilə bu seriyadan daha 14 ədəd xüsusi yubiley saatları hazırlatdırdı. Belə ki, “I Beynəlxalq Rəsulzadə qiraətləri” (2022) kitabında “M.Ə.Rəsulzadə və Azərbaycan gəncliyi” mövzusunda ilk məqalənin müəllifi, jurnalist-araşdırmaçı Nicat İsmayılbəyli də mükafatçılar sırasına daxil edilmişdi. Konfrans günlərində mükafata layiq görülmüş gənclərdən yalnız dörd nəfəri Bakıda olmuş, onun işində iştirak etmiş və təltif olunmuşdu. Xaricdə yaşayan və təhsil alan daha üç nəfərə sonrakı aylarda Bakıya gələrkən özlərinə (bir nəfərin valideynlərinə) mükafatları çatdırılmışdır. Bu il avqust ayının əvvəllərində Diasporla İş üzrə Dövlət Komitəsinin Laçında təşkil etdiyi yay düşərgəsinin iştirakçıları arasında daha bir mükafatçımıza – Gürcüstandan olan Laşa İsabalayevə rast gələndə çox şad olmuş, evinə dönməzdən bir gün əvvəl onunla bağ evimdə görüşərək mükafatını təqdim etmişdim. Bu günlər “Rəsulzadə mənim üçün kimdir” sualını cavablandırnış daha iki nəfər gəncimizin Bakıda olduğunu biləndə düzü onlara mükafatları təntənəli şəkildə - “II... Qiraətlərin” tanınmış müəlliflərinin- görkəmli alimlərin, Vahid Mustafayevin özünün iştirakı ilə təqdim etməyi düşünürdüm. Amma Eyyubun iki gündən sonra təhsil aldığı Avstriyaya qayıdacağı xəbəri bu planlarımı pozdu, bir günün içində “Rəsulzadə tədiqatçıları ailəsini” toplaya bilmədim. Şimali Kipr Respublikasında yaşayan müəllifimiz, tanınmış alim Nazim Muradovun da bir neçə günlük Bakıya gəldiyi məlum olanda Nazim müəllimə hələ üzünü görmədiyi kitabı, Avstriya və Polşadan olan gənclərimizə isə esseləri dərc olunmuş kitabla birlikdə “Rəsulzadə-140” yubiley - xatirə saat mükafatlarının təqdimatını ən xudmani şəkildə də olsa keçirmək qərarını verdim. Gənclərimizi təbrik edirəm və onlarla ünsiyyətdən böyük qürur duyuram. Bir daha əmin oluram ki, dövlətçiliyimizin gələcəyi ağıllı, savadlı, sağlam düşüncəli, məsuliyyətli və vətənpərvər əllərdədir.

P.S. Bu iki gəncin Rəsulzadə haqda yazdığı esselərdən ayrıca fikirləri adı gedən kitabın arxa qabığında yer almışdır:

Eyyub İsrafilov: “Məhəmməd Əmin Rəsulzadə öz dünyasını dəyişməzdən öncə bu dünyanı dəyişmiş bir insan idi”.

Cavanşir Amanov: “Rəsulzadə feodal dövrün müsəlman\ərəb kimliyi ilə yaşayan və inancları ucbatından hər keçən gün bir az daha məhv olmağa davam edən bir xalqa türk olduğunu xatırladan və məhz azərbaycanlı kimliyi ilə xalqı çağdaş dünyaya dəvət edən şəxsiyyətdir”.