Zəngəzur Dəhlizi türk dünyasının inkişafına töhfə verəcək

Türkiyənin Səlcuq Universitetində keçirilən simpoziumda çıxış edən Türk Dövlətləri Təşkilatının (TDT) Ağsaqqallar Şurasının rəhbəri Binəli Yıldırım bildirib ki, Orta Dəhlizin bir hissəsi olan Zəngəzur Dəhlizi türk dünyasının inkişafına mühüm töhfə verir.

Onun sözlərinə görə, Azərbaycanın qərb bölgələri ilə Naxçıvan Muxtar Respublikası arasında marşrutun açılması "qaynar suları və sərvətləri türk xalqlarının rifahı üçün istifadə ediləcək" türk dünyasının potensialını açacaq.

"Zəngəzur Dəhlizi türk dünyasının gələcəyi üçün xüsusi əhəmiyyət kəsb edir", - deyə o bildirib.

Yıldırım TDT ölkələri arasında ticarət rəqəmlərinə diqqət çəkərək qeyd edib ki, bu gün bu rəqəm türk dövlətləri arasında 1,1 trilyon dollarlıq xarici ticarət dövriyyəsindən yalnız 70 milyard dollar təşkil edir.

TDT Ağsaqqallar Şurasının rəhbəri həmçinin 34 hərfdən ibarət olan ortaq türk əlifbasının tam istifadəsinin vacibliyini vurğulayıb.
"Ortaq türk əlifbası ilə bağlı iş prinsipləri razılaşdırılıb. Bu gün bu əlifbanın faktiki olaraq tətbiqi vacibdir. Hər şey ayrı-ayrı ölkələrin siyasi iradəsindən və onu tətbiq etmək öhdəliyindən asılıdır. Bu, vaxt tələb edir", - deyə B. Yıldırım bildirib və qeyd edib ki, yeni əlifba sayəsində TDT ölkələrinin sakinləri istənilən türk dilini oxuya biləcəklər.

TDT Ağsaqqallar Şurasının rəhbəri həmçinin türk dünyasının ortaq tarixi ilə bağlı dərsliklərin hazırlanması, gömrük prosedurlarının sadələşdirilməsi və infrastrukturun inkişafı kimi məsələləri türk dövlətlərinin inteqrasiyası üçün gündəliyin vacib maddələri kimi sadalayıb.