Avropa Ukraynanın təhlükəsizlik zəmanətlərini açıqladı

Avropa liderləri Ukrayna üçün gələcək təhlükəsizlik zəmanətlərinin konturlarını açıqlayıblar.

Avropa liderlərinin bəyanatında bildirilir ki, ABŞ və Avropa liderləri Ukraynaya etibarlı təhlükəsizlik zəmanətləri vermək və müharibədən sonra bərpa olunmasını dəstəkləmək üçün birgə işləməyə sadiqdirlər.

Buraya aşağıdakı öhdəliklər daxildir:

• Ukraynaya silahlı qüvvələrinin sayının artırılmasında kömək etmək (sülh dövründə bu rəqəm 800.000 nəfərə çatmalıdır);
• ABŞ tərəfindən dəstəklənən və Ukrayna ərazisində fəaliyyət göstərən Avropa "Ukrayna üçün çoxmillətli qüvvə" ("könüllülər koalisiyası"na daxil olan dövlətlərdən) yaratmaq. Bu qüvvə Ukrayna Silahlı Qüvvələrinin yenidən qurulmasına kömək edəcək, Ukrayna hava məkanının təhlükəsizliyini təmin edəcək və daha təhlükəsiz dəniz naviqasiyasını dəstəkləyəcək;
• ABŞ-ın rəhbərliyi ilə atəşkəs monitorinqi və yoxlama mexanizminin yaradılması; gələcək silahlı hücum halında sülhün və təhlükəsizliyin bərpası üçün tədbirlər görmək (bu tədbirlərə silahlı qüvvələrin istifadəsi, kəşfiyyat və logistika yardımı, iqtisadi və diplomatik tədbirlər daxil ola bilər). Bu, hüquqi cəhətdən məcburi bir öhdəlik olmalıdır.

Bundan əlavə, liderlər Ukraynanın Aİ-yə daxil olmasını "qətiyyətlə dəstəkləyəcəklərinə" və onun gələcək çiçəklənməsinə, o cümlədən bərpa və yenidənqurma işlərinə kömək göstərəcəklərinə söz veriblər.

Bəyanatı 13 lider imzalayıb: Almaniya Kansleri; Fransa, Finlandiya və Litva prezidentləri; Birləşmiş Krallıq, Danimarka, İtaliya, Hollandiya, Norveç, Polşa və İsveçin baş nazirləri;  Avropa Komissiyası və Avropa Şurasının rəhbərləri.