BP 2026-cı ildə Əşrəfi-Dan Ulduzu-Aypara blokunda çalışacaq

BP-Azerbaijan: Britaniyanın BP şirkəti 2026-cı ildə Əşrəfi-Dan Ulduzu-Aypara (ADUA) perspektivli strukturlar blokunda seysmik tədqiqatlar aparmağı planlaşdırır.

Layihənin operatoru olan BP-Azerbaijan şirkətinin məlumatına görə, şirkət ADUA blokundakı seysmik tədqiqat proqramı üçün Ətraf Mühitə Təsirin Qiymətləndirilməsi (ƏTQ) layihəsini hazırlayıb.

Sənəddə təklif olunan seysmik tədqiqat proqramının qısa icmalı təqdim olunur, bu fəaliyyətlərin potensial ətraf mühitə və sosial-iqtisadi təsirləri araşdırılır və tövsiyə olunan təsirin azaldılması və monitorinq tədbirləri təsvir olunur.

ƏTQ prosesi təklif olunan fəaliyyətlərdən irəli gələn hər hansı mənfi ətraf mühitə və sosial-iqtisadi təsirləri müəyyən etməyi, minimuma endirməyi və mümkün olduqda aradan qaldırmağı hədəfləyir.

ADUA layihəsi üçün seysmik tədqiqat proqramına 2D yüksək dəqiqlikli (HR) seysmik tədqiqatlar daxildir. Bu tədqiqatların qısamüddətli, 12 saatlıq cədvəldə 20 günə qədər və 24 saatlıq cədvəldə 10 günə qədər davam etməsi planlaşdırılır. Tədqiqatlar ADUA blokunun şimal-qərb hissəsindəki kiçik bir ərazini əhatə edəcək.

Proqramın 2026-cı ilin fevral-aprel ayları arasında suyun 20-40 metr dərinliyində aparılması planlaşdırılır. 2D HR seysmik tədqiqatlarının əsas məqsədi gələcək kəşfiyyat quyularının planlaşdırılmasına kömək etmək üçün təxminən 1500 metr dərinlikdə yerləşən formasiyalar haqqında ətraflı məlumat əldə etməkdir.

Tədqiqatların qazma əməliyyatlarına və quyuların bütövlüyünə təsir göstərə biləcək çatlar, dayaz qaz yığılmaları və digər geoloji xüsusiyyətlər daxil olmaqla yeraltı geoloji riskləri müəyyən etməsi gözlənilir.

ƏMTQ sənədinin 26 yanvar 2026-cı il tarixinə qədər dərc edilməsi planlaşdırılır.

Xəbər verildiyi kimi, 3 iyun 2025-ci il tarixində Bakı Enerji Həftəsi zamanı BP Azərbaycan Respublikası Dövlət Neft Şirkəti (SOCAR) ilə ADUA layihəsində pay əldə etmək üçün müqavilə imzalayıb. Müqaviləyə əsasən, BP Əşrəfi-Dan Ulduzu-Aypara yatağının işlənməsi layihəsində 35% pay əldə edib və operatordur. Qalan 65% paya SOCAR sahibdir.

Əşrəfi-Dan Ulduzu-Aypara strukturu Bakıdan 90-110 km şimal-şərqdə, 80-180 metr dərinlikdə yerləşir.