BP Bakı-Supsa və BTC-nin operatorluğundan çıxır

BP şirkəti Bakı-Supsa və Bakı-Tbilisi-Ceyhan boru kəmərlərinin operatoru rolunun təhvil verilməsi ilə bağlı danışıqlar aparır.

Bu barədə şirkətin Gürcüstandakı nümayəndəliyindən “Business Media” nəşrinə məlumat verilib.

Bildirilib ki, qüvvədə olan müqavilələrə uyğun olaraq, BP boru kəmərləri sisteminin operatorluğunun ötürülməsi üzrə danışıqları müvafiq tərəflərlə aparır. Danışıqların əsas istiqaməti Gürcüstanda yerləşən Bakı-Supsa neft kəmərinə aid obyektlərin Gürcüstanın Neft və Qaz Korporasiyası və yaxud onun təyin etdiyi operatora qaytarılması və Bakı-Tbilisi-Ceyhan neft kəmərinin idarəçisi, baş operatoru və Cənubi Qafqaz Neft Kəmərinin (CQNK) funksiyalarının “SOCAR Midstream” şirkətinə ötürülməsindən ibarətdir.

Gürcüstandan keçən iki boru kəmərinin istismarından çıxmasından baxmayaraq, BP BTC və CQNK-nin səhmdarı olaraq qalır. Şirkət BTC səhmlərinin 30,1%-nə, CQNK səhmlərinin isə 29,99%-nə sahibdir.

Operator funksiyalarının ötürülməsi prosesinin başa çatdırılması müvafiq sazişin əldə olunacağı təqdirdə, 2026-cı ilin birinci yarısının sonuna planlaşdırılıb.

Qeyd olunub ki, operator rolunun ötürülməsi Səngəçal terminalına şamil edilmir. Müvafiq tərəflərə operator funksiyasının təhvil verilməsindən sonra BP “Azəri-Çıraq-Günəşli”, “Şah Dəniz” layihələri və Səngaçal terminalının operatoru rolunu özündə saxlayacaq, BTC və CQNK layihələrində səhmdar qismində iştirakını davam etdirəcək.

Gürcüstanda operator rolunun ötürülməsindən sonra BP müəyyən vaxt tələb edəcək qiymətləndirmə aparacaq.