Fransada bazar günü iğtişaşlar gözlənilir FOTO

Fransa Daxili İşlər Nazirliyi bir neçə gün davam edə biləcək növbədənkənar parlament seçkilərinin ikinci turu başa çatdıqdan sonra kütləvi iğtişaşlardan ehtiyat edir.

Bunu respublikanın Daxili İşlər Nazirliyinin rəhbəri Jerald Darmanen deyib

“Bazar günü vəziyyətin nəzarətdən çıxa biləcəyinə inanmaq üçün hər cür əsas var. Söhbət saat 20:00-da Milli Assambleyanın (parlamentin aşağı palatası) qarşısında qadağan edilməsini tələb etdiyim mitinqdən gedir. Ultra solçuların iğtişaşlar təşkil etməsi ehtimalı var. Bundan əlavə, digər şəhərlərdə, xüsusən də ifrat sağçı və ifrat solçuların cəmləşdiyi Lion, Renn və Nantda zorakılıqların baş verməsi mümkündür”. 

Bununla əlaqədar olaraq, nazir Fransa şəhərlərinin küçələrində asayişi qorumaq üçün 30 min polis məmuru və jandarm göndərilməsini əmr edib ki, onlardan 5 mini Paris və onun ətraflarında növbətçi olacaq. Onun sözlərinə görə, ən gərgin dövr bazar günündən bazar ertəsinə keçən gecə səsvermə başa çatdıqdan dərhal sonra olacaq. “Ancaq 2-3 gün dayanmalı olsaq, 2-3 gün davam edəcəyik” dedi.

İyunun 9-da Fransa prezidenti Emmanuel Makron tərəfdarlarının Avropa Parlamentinə seçkilərdə məğlub olması səbəbindən Milli Assambleyanın buraxılması barədə qərar qəbul edib. İyunun 30-da Milli Məclisə keçirilən növbədənkənar seçkilərin birinci turunun nəticələrinə görə, Milli Mitinq partiyası 33 faiz səslə irəli çıxıb. Solçuların “Yeni Xalq Cəbhəsi” alyansı 28 faiz, “Respublika naminə” prezident koalisiyası isə 20 faiz səs toplayıb. İyulun 7-də baş tutacaq ikinci tur həlledici olacaq.

Darmanen bildirib ki, Fransa hüquq-mühafizə orqanları son günlər Olimpiya Oyunları zamanı terror aktları hazırlamaqda şübhəli bilinən bir neçə nəfəri saxlayıb.

"Terror təhlükəsi son dərəcə ciddi olaraq qalır. Seçki kampaniyasının ortasında olduğumuz üçün son bir neçə gündə bunu ictimaiyyətə açıqlamadıq, lakin terror hücumları planlaşdırıb həyata keçirə bilən insanları həbs etdik", - Darmanen bildirib.

Daxili İşlər Nazirliyinin rəisi şübhəlilərin dəqiq sayını açıqlamayıb, sadəcə iki fərqli yerdə bir neçə həbsin olduğunu bildirib. O əlavə edib ki, onlarla Fransa məhkəmə sistemi məşğul olur.

Parisdə Olimpiya Oyunları iyulun 26-dan avqustun 11-dək keçiriləcək. Açılış mərasimi Sena çayında keçiriləcək. Sena sahili boyunca və Trokaderoda baş tutacaq açılış mərasimində potensial təhlükələrin yüksək riski fonunda tamaşaçıların sayının 600 mindən 326 minə endirilməsi qərara alınıb. Olimpiadaların keçirildiyi ərazilərdə və Paris sahillərinin yaxınlığında hərəkət etmək üçün oyunlarda xüsusi QR kodları tətbiq ediləcək.