İran farsdilli icmaların yaradılmasına çağırır

İranın Birinci Vitse-prezidenti Məhəmməd Rza Arif farsdilli icmalar arasında mədəni və sivilizasiya əməkdaşlığını gücləndirmək üçün "Farsdilli Ölkələr və Regionlar Birliyi"nin yaradılmasını təklif edib.

Arif bu təklifi Tacikistanın Enerji və Su Ehtiyatları naziri Dalir Cümə ilə görüşündə irəli sürüb və İran və Tacikistanın ortaq mədəni, sivilizasiya və dil irsinin ikitərəfli münasibətlərin genişləndirilməsi üçün güclü təməl yaratdığını vurğulayıb.

Bu barədə "Mehr" xəbər yayıb.

O, iki ölkənin strategiyasının bütün səviyyələrdə əlaqələri inkişaf etdirmək olduğunu və əməkdaşlığın genişləndirilməsində heç bir əsas maneə olmadığını bildirib.

Son illərdə iqtisadi və ticarət əlaqələrinin inkişafına toxunan İranın vitse-prezidenti iki ölkənin irəliləyiş əldə etdiyini, lakin arzuolunan səviyyədən aşağıda qaldığını bildirib.

Arif həmçinin İranın elmi, texniki və mühəndislik imkanlarını vurğulayaraq, İslam Respublikasının elmi və texniki nailiyyətlərini dost və qonşu ölkələrlə bölüşməyə hazır olduğunu bildirib.

O, təklif olunan birliyin farsdilli dünyada mədəni və sivilizasiya əməkdaşlığının səviyyəsini yüksəldə biləcəyini və İran və Tacikistan arasında rəsmi səfərlər və görüşlər zamanı ciddi şəkildə davam etdirilməli olduğunu bildirib.

Cümə öz növbəsində bildirib ki, son illərdə iki ölkə arasında iqtisadi, ticarət və mədəni əlaqələr inkişaf edib. O əlavə edib ki, ikitərəfli əməkdaşlığın davam etdirilməsi qalan bürokratik maneələrin aradan qaldırılmasına kömək edə bilər.