Özbəkistanda prezident seçkiləri

Özbəkistanda iyulun 9-na təyin edilmiş prezident seçkilərində vaxtından əvvəl səsvermə iyunun 28-dən iyulun 5-dək keçiriləcək.

Bu barədə TASS-a Özbəkistan Mərkəzi Seçki Komissiyasının mətbuat xidmətindən məlumat verilib.

"MSK-nın təsdiq etdiyi seçki kampaniyasının təqvim planına uyğun olaraq, Özbəkistanda növbədənkənar prezident seçkilərində vaxtından əvvəl səsvermə iyunun 28-dən iyulun 5-dək keçiriləcək", - sözçü bildirib.

Onun sözlərinə görə, seçki məcəlləsinə uyğun olaraq, seçki günü yaşayış yerində ola bilməyən seçici vaxtından əvvəl səs verə bilər. O, aydınlaşdırıb ki, bunun üçün seçici seçki günü iştirak etməməsinin səbəbini, bunun məzuniyyət, ezamiyyət, xaricə səfər və ya digər üzrlü səbəbi göstərilməklə məntəqə seçki komissiyasına ərizə ilə müraciət etməlidir.

Bundan əvvəl Özbəkistan Prezidenti Şavkat Mirziyoyev mayın 8-dən qüvvəyə minən növbədənkənar prezident seçkilərinə icazə verən qanunu imzalayıb, daha sonra isə fərmanla növbədənkənar seçkilər iyulun 9-na təyin edilib. Seçki Məcəlləsi əvvəllər növbədənkənar seçkilərə yalnız o halda icazə verirdi ki, hazırkı prezident üç ay müddətində səlahiyyətlərini icra edə bilməyəcək. Bu müddət üçün dövlət başçısının səlahiyyətləri Senatın sədrinə keçdi.