Rusiyada prezident seçkilərində üç gün səsvermə olacaq

Rusiya Federasiyasının Mərkəzi Seçki Komissiyası (MSK) prezident seçkiləri üçün üç günlük səsvermənin keçirilməsini rəsmən təsdiqləyib.

Səsvermə 2024-cü il martın 15, 16 və 17-də baş tutacaq.

Bu barədə Mərkəzi Seçki Komissiyasının seçki kampaniyasının başlanmasına həsr olunmuş ilk iclasında məlumat verilib.

Rusiyaya birləşdirilən bölgələrdə seçkilərin keçirilməsi ilə bağlı qərar təhlükəsizlik qüvvələri ilə məsləhətləşmələrdən sonra dekabrın 12-nə qədər veriləcək.

Mərkəzi Seçki Komissiyasının rəhbəri Ella Pamfilova deyib: “Üç gün ərzində səsvermə artıq bizim seçki sistemimiz üçün ənənəvi hal alır”.

O xatırladıb ki, belə bir sistem ilk dəfə olaraq pandemiya zamanı seçicilərin təhlükəsizliyini təmin etmək üçün istifadə olunub.

Ella Pamfilovanın sözlərinə görə, çoxgünlük seçki “seçicilər tərəfindən bəyənilib” və bunu rəy sorğuları da təsdiqləyir.

Mərkəzi Seçki Komissiyasının rəhbəri vurğulayıb ki, Rusiya tarixində oxşar presedentlər olub. O, təsis məclisinə seçkilərin üç gün davam etdiyi 1917-ci ili misal çəkdi. “Biz öz tariximizi xatırlamalıyıq”, - deyə Pamfilova bildirib.