Sankt-Peterburqda qaz terminalında partlayış baş verib

Rusiyanın Sankt-Peterburq şəhəri yaxınlığındakı qaz ixrac terminalında partlayış baş verib.

BBC "RİA Novosti" xəbər agentliyinə istinadən xəbər verir ki, partlayış böyük yanğına səbəb olub. Yanğının qarşısının alındığı, xəsarət alanların olmadığı bildirilib.

Yanğının səbəbi məlum deyil, lakin yerli media bölgədə pilotsuz təyyarələrin göründüyünü bildirib.

Həm Rusiya, həm də Ukrayna hazırkı münaqişədə pilotsuz təyyarələrdən istifadə ediblər. Ukrayna adətən belə hücumları etiraf etmir.

Regional qubernator Aleksandr Drozdenko bildirib ki, Finlandiya körfəzindəki Ust-Luqada qaz istehsalçısı Novatek terminalında baş vermiş insidentdən sonra “yüksək xəbərdarlıq rejimi” tətbiq edilib. O, böyük yanğın kimi görünən videonu paylaşıb.

Rusiyanın “Shot” xəbər agentliyi yerli sakinlərə istinadən Rusiyanın Estoniya ilə sərhədinə yaxın Ust-Luqada bir neçə partlayışın ardınca pilotsuz təyyarənin səsi eşitdiklərini bildirib.

Sankt-Peterburqda yerləşən “Fontanka” xəbər agentliyi yanğın başlamazdan əvvəl şəhərə doğru uçan ən azı iki pilotsuz təyyarənin göründüyünü bildirib.

Yanğının yaxınlığında üç böyük beynəlxalq tankerin olduğu bildirilsə də, onlara dəyən ziyan barədə məlumat yoxdur.

Qeyd edək ki, Ukrayna rəsmilərindən heç bir şərh verilməyib.