“Sheki Open 2026” Beynəlxalq Şahmat Festivalı

"VMF" şirkətinin təsisçisi Vahid Mustafayev fəxri qonaq qismində iştirak edib

Oxuma müddəti:

2 dəqiqə

Şəki şəhərində “Sheki Open 2026” Beynəlxalq Şahmat Festivalı keçirilib.

Festivalın təntənəli açılış mərasimində Şəki Şəhər İcra Hakimiyyətinin başçısı Elxan Usubov və Azərbaycan Şahmat Federasiyasının prezidenti Mahir Məmmədov ilə yanaşı, "VMF" şirkətinin təsisçisi Vahid Mustafayev fəxri qonaq qismində iştirak edib.

Vahid Mustafayev öz nitqində şahmatın insanın analitik təfəkkürünü və strateji düşüncəsini inkişaf etdirmək rolundan bəhs edərək deyib:

"Şahmat sadəcə bir oyun deyil, böyük bir strategiya və iradə mübarizəsidir. Şirkət olaraq biz hər zaman intellektual layihələri, gənclərin zəka inkişafını dəstəkləməkdən qürur duyuruq. Bu gün burada dünyanın fərqli ölkələrindən gələn yüzlərlə şahmatçını görmək fərəhləndiricidir. Bütün iştirakçılara bu gərgin mübarizədə uğurlar arzulayıram".

Çıxışların ardınca rəsmi Vahid Mustafayev digər fəxri qonaqlarla birlikdə şahmat taxtası arxasına keçərək turnirin rəmzi ilk gedişini edib və beynəlxalq yarışa rəsmən start verib.

9 turdan ibarət yarışın A turnirində 7 xal toplayan Azərbaycan şahmatçısı Vüqar Rəsulov birinci yeri tutub. Eyni xala malik Murad İbrahimli əlavə göstəricilərə görə ikinci yerlə kifayətlənib. İlk üçlüyü daha bir təmsilçimiz İslam Hacıəliyev (6,5 xal) qapayıb.

B turnirində Emin Gəncəliyev, Məhəmməd Vəliyev (Qazaxıstan) və Vüsal Əhmədov 7 xal toplayıb. Əlavə göstəricilərə görə Emin Gəncəliyev B turnirinin qalibi adını qazanıb. Qazaxıstan şahmatçısı Məhəmməd Vəliyevlə həmyerlimiz Vüsal Əhmədov 2-3-cü yerləri bölüşdürüb.

C turnirində 8 xala malik Məhəmmədəli Allahverdiyev birinci pillədə qərarlaşıb. Yusif Quliyev yarışı ikinci, Fateh Mirzə isə üçüncü yerdə başa vurub.

Festival çərçivəsində rapid və blits yarışları da keçirilib. Rapid turnirində İslam Hacıəliyev, blitsdə isə Macarıstan təmsilçisi Sənan Sjugirov birincilik əldə edib.

Azərbaycan Şahmat Federasiyası və Gənclər və İdman Nazirliyinin birgə təşkil etdiyi “Azərbaycan Şahmat Turu” layihəsinin bu mühüm mərhələsində 10-a yaxın ölkədən 400-dən çox şahmatçı mübarizə aparıb.