Tramp hökumət qurumlarında ixtisar aparacaq

ABŞ Prezidenti Donald Tramp cümə günü Qlobal Media Agentliyinin və bəzi digər hökumət qurumlarının fəaliyyət miqyasının əhəmiyyətli dərəcədə azaldılması haqqında fərman imzalayıb.

Müvafiq sənədi Ağ Ev dərc edib.

Qlobal Media Agentliyi xarici siyasətin təbliğinə cavabdehdir və "Amerikanın səsi" və "Azadlıq/Azad Avropa" kimi dövlət büdcəsindən maliyyələşdirilən ABŞ radiostansiyalarının fəaliyyətini əlaqələndirir. Rəsmi olaraq agentlik ABŞ hökumətinin müstəqil qurumu adlanır.
"Amerikanın Səsi"nin tabe olduğu ABŞ Qlobal Media Agentliyi Konqres tərəfindən müstəqil qurum kimi təsis edilib və Konqres 2020-ci ildə agentliyin prezident tərəfindən təyin olunan baş direktorunun səlahiyyətlərini məhdudlaşdırmaq üçün qanun qəbul edib. Qlobal Media Agentliyi "Amerikanın Səsi" ilə yanaşı, "Azadlıq Radiosu/Azad Avropa" və "Radio Free Asia"nı da maliyyələşdirir. Təxminən 270 milyon dollarlıq büdcəsi və 2 000-dən çox əməkdaşı olan bu qurum 49 dildə yayımlanır.

Siyahıya həmçinin Vudro Vilson Mərkəzi, Federal Vasitəçilik və Barışıq Xidməti, Muzey və Kitabxana Xidmətləri İnstitutu (ABŞ-də muzey və kitabxanalara dəstək göstərir), Evsizlik Problemləri üzrə İdarələrarası Şura, İnkişaf Maliyyə İnstitutları Fondu, Azlıqların Biznesinin İnkişafı Agentliyi və Arktikanın Tədqiqi Komissiyası daxil edilib.

Tramp hökumətin işinin səmərəliliyinin artırılması üzrə qurumla (DOGE) birlikdə federal işçilərin kütləvi şəkildə işdən çıxarılmasını və ABŞ-nin Beynəlxalq İnkişaf Agentliyi (USAID) və İstehlakçıların Maliyyə Müdafiəsi Bürosu kimi qurumların ləğvini həyata keçirir.