Zelenski Əbu-Dabidə danışıqlar haqda məlumat verib

Ukrayna Prezidenti Volodimir Zelenskinin sözlərinə görə, Əbu-Dabidə danışıqlar zamanı Rusiya nümayəndə heyəti Ukraynanın nəzarəti altında olan Donbass ərazilərini artıq Rusiya Federasiyası Silahlı Qüvvələrinin nəzarəti altına keçmiş ərazilər kimi təqdim etməyi xahiş edib.

Ukrayna nümayəndə heyəti bildirib ki, bu ərazilər üzərində Ukrayna Silahlı Qüvvələrinin nəzarəti ilə bağlı videolar, fotoşəkillər və digər sübutlar təqdim edə bilər və Amerika tərəfi Ukraynanın reallıqla bağlı qiymətləndirməsini təsdiqləyib.

"Problem də bundadır. Putin fərqli bir reallıqda yaşayır. Əlbəttə ki, o, amerikalılara deyəcək ki, Ukraynanın şərqini tamamilə işğal etmək üçün bir-iki ay lazımdır. Mən də ona Rusiyanı tamamilə işğal etdiyim bir şəkil çəkə bilərəm. Amma bu, doğru deyil.

Müsbət məqam Amerika tərəfinin döyüş meydanında baş verənlərlə bağlı Ukraynanın qiymətləndirməsini təsdiqləməsi olub.

Buna görə də liderlər səviyyəsində oturub danışmalıyıq. Bir çox sual var. Məsələn, demarkasiya xəttinin çay boyunca keçdiyi Xerson şəhəri haqqında danışdıq. Ruslar bir sahilə, biz isə digərinə nəzarət edirik. Amma insanlar hər iki sahildə birlikdə yaşamaq istəyirlər. Bu, Ukrayna şəhəridir. Bu cür suallar həssasdır, amma biz bu barədə danışmalıyıq. Düşünürəm ki, komandalar liderlər səviyyəsində görüşmək imkanlarını müzakirə edəcəklər. Rusiyanın hazır olduğundan əmin deyiləm, amma biz bu məsələni qaldıracağıq" - Zelenski jurnalistlərlə görüşdə bildirib.

Qeyd edək ki, danışıqların iştirakçılarına istinadən, variantlardan biri kimi Ukraynanın ölkənin inzibati bölgüsünü və Donbasın sərhədlərini hazırkı təmas xətti boyunca dəyişdirməyi təklif etdiyi barədə məlumatlar yayılır ki, Kreml Rusiya daxilində bəyan edə bilsin: "Xüsusi Hərbi Əməliyyatın məqsədi yerinə yetirildi, Donbas tamamilə azad edildi!".