Zəngəzur dəhlizi region xalqlarının maraqlarına xidmət etmir

"Zəngəzur dəhlizinin açılması region xalqlarının maraqlarına xidmət etmir".

İran parlamenti Zəngəzur da daxil olmaqla məcburi nəqliyyat dəhlizlərinin yaradılmasının Cənubi Qafqaz xalqlarının maraqlarına zidd olduğunu və kollektiv təhlükəsizliyə birbaşa təhdid yaratdığını qeyd edən bəyanat qəbul edib.

Bu barədə "Mashregh News" nəşri yazır.

Parlamentin Rəyasət Heyətinin üzvü Əhməd Naderinin oxuduğu bəyanatda Cənubi Qafqazın İran üçün təkcə sərhəd deyil, həm də təhlükəsizlik zonası, ərazi dərinliyi, mühüm iqtisadi və tranzit dəhlizi kimi strateji əhəmiyyətə malik olduğu vurğulanıb. Tanınmış sərhədləri dəyişdirmək və ya İranın geoiqtisadi mövqeyini zəiflətməyə yönəlmiş layihələri həyata keçirmək cəhdləri qəbuledilməzdir.

Parlament həmçinin xatırladıb ki, aidiyyəti dövlətlərin razılığı olmadan sərhədlərin dəyişdirilməsi BMT Nizamnaməsini və ölkələrin ərazi bütövlüyü prinsipini pozur. İran ölkənin milli təhlükəsizliyi və maraqlarını qorumaq üçün bütün siyasi, hüquqi və qanuni vasitələrdən istifadə etmək hüququnu özündə saxlayır.

Deputatlar regionun bütün dövlətlərini mehriban qonşuluq prinsiplərinə riayət etməyə, təxribatçı hərəkətlərdən çəkinməyə, qarşılıqlı hörmət və mövcud sərhədlərə əsaslanan iqtisadi və tranzit əməkdaşlığı inkişaf etdirməyə çağırıblar.