Avroliqa: “Qarabağ” Fransa klubuna məğlub olub

23:38

“Qarabağ” UEFA Avropa Liqasının Liqa mərhələsində Fransa təmsilçisi “Lion”a məğlub olub.

Ağdam təmsilçisi V turun oyununda 1:4 hesabı ilə uduzub.

Tofiq Bəhramov adına Respublika stadionunda baş tutan matçda hesabı 15-ci dəqiqədə qonaqlar açıb. Jorj Mikautadze dəqiq zərbə müəllifi olub. 63-cü dəqiqədə fərq iki topa yüksəlib. Korentin Tolisso toru silkələyib. 68-ci dəqiqədə Malik Fofana meydan sahiblərinin qapısına yol tapıb. 80-ci dəqiqədə Jorj Mikautadze dubl müəllifi olub. Görüşdə yekun hesabı isə Ağdam təmsilçisinin heyətində Juninyo müəyyənləşdirib. Hücumçu 87-ci dəqiqədə penalti zərbəsini dəqiq yerinə yetirib.

Qeyd edək ki, Qurban Qurbanovun rəhbərlik etdiyi kollektiv Avropa Liqasında növbəti oyununu dekabrın 12-də İsveç təmsilçisi “Elfsborq”a qarşı keçirəcək.

***

10:08

“Qarabağ” bu gün UEFA Avropa Liqasında növbəti oyununu keçirəcək.

Azərbaycan çempionu Liqa mərhələsinin V turunda Bakıda Fransanın “Lion” klubunu qəbul edəcək.

Tofiq Bəhramov adına Respublika Stadionunda reallaşacaq görüş saat 21:45-də start götürəcək. Matçı serbiyalı FIFA referisi Nenad Minakoviç idarə edəcək. Qarşılaşmanın hakim-inspektoru isə türkiyəli Cüneyt Çakır olacaq.

Qeyd edək ki, 4 turdan sonra “Qarabağ” 3 xalla 29-cu pillədə qərarlaşıb. “Lion” isə 7 xalla 9-cu sırada yer alıb.