Gürcüstanın vitse-spikeri Ermənistan deputatlarını qınadı

Gürcüstan mediasının məlumatına görə, Gürcüstan Parlamentinin vitse-spikeri Nino Tsilosani Ermənistan parlamentinin deputatlarının Avronest Parlament Assambleyasının Gürcüstanla bağlı qətnaməsini imzalayanlar arasında olmasından təəssüfləndiyini bildirib.

Tsilosani sənədi imzalayan erməni deputatların öz baş nazirlərinə inamsızlıqlarını ifadə etdiklərini bildirib.

Tsilosani bildirib ki, "Gürcüstan hökumətinin qanunsuz olduğunu bildirən qətnaməni dəstəkləməklə, Ermənistan parlamentinin deputatları baş nazirlərinə inamsızlıqlarını faktiki olaraq ifadə ediblər, çünki Ermənistan baş naziri Gürcüstana rəsmi və işgüzar səfərlər edib və xalq tərəfindən seçilmiş hökumətlə görüşlər keçirib".

O, Avronest Parlament Assambleyasının Yerevanda keçirilən son plenar iclasında qəbul edilən qətnamənin mənasız və məzmunsuz olduğunu vurğulayıb.

Xəbər verildiyi kimi, sənəddə ötən il oktyabrın 26-da Gürcüstanda keçirilən parlament seçkilərinin "saxtakarlıq", hökumətin isə "özünü elan etmiş" kimi təsvir edildiyi bildirilirdi. Buna cavab olaraq, Gürcüstan nümayəndə heyəti Avronest Parlament Assambleyasının gələcək iclaslarında iştirak etməkdən imtina etdiyini açıqlayıb.