Türkiyənin futbol üzrə millisi artıq Ermənistandadır

2024-cü il Avropa çempionatının seçmə mərhələsinin D qrupunun ilk oyununda Ermənistanla səfərdə qarşılaşacaq Türkiyə Milli Futbol Komandası İrəvana gedib. Bu barədə “CNNTurk” məlumat yayıb.

İstanbul hava limanından qalxan təyyarə ilə saat 14:20-də Ermənistanın paytaxtı İrəvandakı Zvartnots Beynəlxalq Hava Limanına gələn türkiyəli futbolçular onlar üçün ayrılmış avtobusla qalacaqları hotelə gediblər.

Hava limanının çıxışında jurnalistlərə qısa açıqlama verən Türkiyə Futbol Federasiyasının (TFF) prezidenti Mehmet Büyükekşi bunları deyib: "Sabah ilk oyunumuzu oynayacağıq. Yaxşı bir başlanğıc etmək istəyirik. 2024-cü il Avropa çempionatı Almaniyada keçirildiyinə görə bizim üçün son dərəcə əhəmiyyətlidir. Almaniyada çoxlu türk var. Ümid edirəm ki, texniki komandamız və futbolçularımız sabah burada, çərşənbə axşamı isə Bursada ən yaxşı nəticəni qazanmaq üçün mübarizə aparacaqlar. Məqsəd Almaniyada keçiriləcək Avropa çempionatında iştirak etməkdir. Beləliklə, ən çox tamaşaçı kütləsinə çata və öz evimizdə oynayırmış kimi oyunlarımızı keçirə bilərik. Komandamızın əhval-ruhiyyəsi çox yaxşıdır".

D qrupunda yarışacaq Ermənistan və Türkiyə yığmaları 2024-cü il futbol üzrə Avropa çempionatının seçmə mərhələsinin ilk oyununu 2023-cü il  martın 25-də saat 21:00-da İrəvanda keçirəcək.