Avropa Liqasının birinci təsnifat mərhələsinin cavab oyununda “Minsk”ə məğlub olan AZAL klubunun baş məşqçisi Nazim Süleymanov oyunla bağlı fikirlərini bölüşüb. Onun sözlərinə görə, bu nəticəni gözləmirmiş: “Futbol səhvlər oyunudur. Kim çox səhv buraxırsa, o, məğlub olur. Biz çox səhv etdik, oyunun əvvəlində qol buraxdıq. Azlıqda daha yaxşı oynadıq”.

Nazim Süleymanov AZAL-ın mərhələ adlaya bilməməsinin məsuliyyətini öz üzərinə götürüb: “Oyundan sonra oyunçulara dedim ki, narahat olmasından. Həmişə məşqçi uduzur. Komandaya və futbolçulara uğurlar arzulayıram. Öz səhvlərimi etiraf edirəm. Bacardığımı etdim. Avropa Liqasındakı məğlubiyyətdə məşqçi günahkardır. Mən gedirəm. Bunu artıq komandaya bildirmişəm. Burada il yarım işlədim. Komandaya, klub prezidentinə məni dəvət etdiyi üçün minnətdaram”.

Nazim Süleymanov hesab edir ki, AZAL “Minsk” səddini keçməliydi. “Amma futbolda yalnız istəmək yox, həm də gücünü meydanda göstərmək lazımdır. Biz bunu göstərə bilmədik. “Minsk” Azərbaycan çempionatında ilk altılığa düşə bilməzdi. Düzünü desək, AZAL da bu oyunla düşə bilməzdi. Başqa məşqçi gəlməli və mənim səhvlərimi düzəltməlidir”.